Pulso by Prof. Domingo G. Landicho

ATTY. RENATO U. GALIMBA
DANGAL NG PAMAYANAN

 

            Itinuturing kong kaloob ng Diyos at banal na tadhana ang pagkakasadlak ko at ng aking pamilya sa Barangay Greater Lagro.

            Permanenteng namamalagi kami sa Lagro mula pa ng 1981, bagaman at pag-aari na namin ang lugal na naging tahanan ng buo naming mag-anak noon pang 1976.

            Kapag inisip ko ang pagsisi-mula, maituturing na isa kami sa pinakaunang gulugod ng pamayanan ng Barangay Greater Lagro, halos bagnos pa mamang ng makabagong lansangan ang dinadaanan, nagpapaikot-ikot sa pagmamaneho, tinatahak ang kugon at talahib, ginugulat ng malalim na tarik at guwang ng La Mesa para namin masapit ang dulo ng kalyeng kalauna’y naging Salubong na gumitna sa maikling daan ngayo’y tinatawag na Mimosa.

            Parang panaginip, dinatnan nami’y banghay ng isang mababang bahay na sementadong bungalow, na ngayong ito’y aming ipinaayos at iniangat, ay natuklasan ng aming mga karpinterong Bikolano na nakatayo sa matibay na adobe.

            Mula sa pangungupahan sa Mandaluyong, sa bahay na ari ng tiyahin ni Edna May na nakatira sa Amerika, lumipat na kami sa Lagro, at mula mga panahon ng 1981, sinimulan ko na ang pagpupunla ng mga puno, waring iniisip kong gayahin ang kinagisnan kong nayon sa Luntal ng Taal, Batangas na bago ako puma-Maynila ay pinaglingkuran ko bilang tinyente del baryo ng tatlong taon, habang nagtuturo ako sa kolehiyo sa Batangas City.

            Isinilang ng bisyon ni Pangulong Ferdinand E. Marcos ang pamayanan ng Lagro, para sa pamayanan ng mga taumbayan na naglilingkod sa pamahalaan. Kung ang panaginip na pagpapabahay sa mga pangkaraniwang Pilipino ay naipagpatuloy at napakalawak, ang sosyal na gusot at problema ng walang tirahan, baha, trapiko, polusyon at kriminalidad sa kasalukuyan kaipala ay natapatan na ng lunas nang maaga.

-o-0-o-

            Nakatutuwa, dito sa Lagro, nagkatipon-tipon ang pamayanan na may kanya-kanyang pangarap at pag-iisip. Katulad ko, wala akong iniisip kundi ang pagtuwang ko sa pagpapabuti ng pamayanan. Alam kong ito rin ang diwang gumabay sa lahat.

            Sa aking palagay, napaka-halagang bagay ang ating ginagawang pamimili ng ating mga lider. Bahagi ito ng proseso ng demokrasya.

            At dahil sa likas na katangian ng pamayanan ng Barangay Greater Lagro, nasa gitnang uri (middle class) na nag-iisip at nagsusuri lagi tayong wasto sa nagiging pasiya.

            Halimbawa: sa pagpili natin ng Punong Barangay, maituturing na ang pagtatampok sa kasalukuyang Punong Barangay, si Atty. RENATO U. GALIMBA bilang Puno at Ama ng barangay nang tatlong sunod-sunod na termino mula noong Disyembre 2007 hanggang sa ngayon ay walang pasubaling makatarungang pasiya.

            At pagkatapos ng isang taong pagkakaupo, noong 2009 nag-umpisa nang umani ang ating Punong Barangay ng Greater Lagro ng halos lahat na pinapangarap na parangal at gantimpala bilang pagkilala ng kanyang paglilingkod, gaya ng mga sumusunod:

            2009 --  BEST PUBLIC SERVANT AWARDEE, mula sa Multi-Media International Foundation; ang News Update National Newspaper at ang DWAD Hotline Balita “Ugnayan ng Masa,”; “BEST PERFORMING PUNONG BARANGAY OF DISTRICT 2, QC”, mula sa “Young Women’s Christian Association of Quezon City (YWCA-QC 38th Founding Anniversary Celebration; at “PHILIPPINE QUALITY SERVICE AWARD OF EXCELLENCE, YWCA-QC.”

            2010 -- “BLUE DIAMOND” AWARDEE FOR EXCELLENCE AS PUBLIC SERVANT, mula “Young Women’s Christian Association ng QC, YWCA-QC 39th Founding Anniversary Celebration; “OUTSTANDING PUNONG BARANGAY OF QC”, YWCA-QC 39 Founding Anniversary; Special Awardee-- “BEST BARANGAY SOLID WASTE MANAGEMENT PRACTICES” -- mula sa Pamahalaan ng Lungsod Quezon.

            2011 -- MOST OUTSTANDING PUNONG BARANGAY NG QUEZON CITY -- “Young Women’s Christian Association of Quezon City; “GAWAD KARINGAL” PUBLIC OFFICIAL INDIVIDUAL RECOGNITION mula QC Police District, 72nd Founding Anniversary Celebration QCPD.

            2012 -- “MOST DISTINGUISHED PUNONG BARANGAY OF QUEZON CITY”, mula sa United Alliance of Leaders in the World (UALW); “DISTINGUISHED NATIONAL LEADER OF THE NATIONAL CAPITAL REGION (NCR)”, mula sa United Alliance of Leaders in the World (UALW).

            At sa matapat at mahusay na pamumuno ni Atty. Galimba, ang ating pamayanang Barangay Greater Lagro ay nagtamo ng mga natatanging karangalan (“HUWARANG BARANGAY” AWARDS) mula sa pamahalaan  ng Lungod Quezon gaya ng mga sumusunod:

            + - Champion, “2011 Best Barangay Peace and Order Committee”

            + - Champion, “2011 BEST BARANGAY LUPONG TAGAPAMAYAPA”

            + - Champion, “2011 BEST BARANGAY GENDER PRACTICES & RESPONSIVE GOVERNANCE”

            + - Champion, “2012 BEST BARANGAY PEACE AND ORDER COMMITTEE”

            + - Champion, “2012 BEST BARANGAY LUPONG TAGAPAMAYAPA”

            + - Champion, “2012 BEST BARANGAY SOLID WASTE MANAGEMENT PRACTICES”

            + - Champion - “2013 BEST BARANGAY PEACE AND ORDER COMMITTEE”

            +  -  1st Runner-Up  -  “2013 BEST BARANGAY GENDER PRACTICES & RESPPONSIVE GOVERNANCE”

            + - Champion, “2014 BEST BARANGAY PEACE AND ORDER COMMITTEE”

            + - Champion, “2014 BEST BARANGAY LUPONG TAGAPAMAYAPA”

            + - Champion, “2014 BEST BARANGAY SOLID WASTE MANAGEMENT PRACTICES”

            + - Champion, “2014 BEST BARANGAY IN QUALITY LEGISLATION”

            +  -  Winner  -  “2016 Seal of Good Housekeeping - GAWAD DANGAL NG LUNGSOD”

            +  -  Winner  -  “2017 Seal of Good Housekeeping - GAWAD DANGAL NG LUNGSOD”.

            Ang “GAWAD DANGAL NG LUNGSOD” ay siyang pinakamataas na parangal na taon-taong iginagawad ng pamahalaang Lungsod at DILG sa “Best Performing Barangay” mula sa kabuuang142 barangay dito sa Lungsod Quezon. 

            At dahil ang ating barangay ay nakamit ang nasabing parangal sa dalawang magkasunod na taon (2016 at 2017), tayo ay siyang  nag-iisang kandidato para sa pinakamimithing “HALL OF FAME AWARD” na ibinibigay sa isang barangay na magkakamit ng nasabing parangal nang tatlong sunod-sunod na taon.  

            At sa tulong-tulong nating pagsisikap at sama-samang panalangin, tayo ay umaasa na mapapasa atin ang natatanging parangal at maluluklok and ating pinakamamahal na barangay sa “HALL OF FAME” ng “Seal of Good Housekeeping”.

            Ako ay naniniwala, ang namumuno ay kumukuha ng lakas at diwa sa pamayanang kaniyang pinaglilingkuran.

            Ang mga tagumpay at pagkilala na iginawad sa ating Punong Barangay, Atty. Renato U. Galimba ay tagumpay at pagkilala rin sa dangal ng pamayanan ng Barangay Greater Lagro. (Domingo G. Landicho)